सिंगारिए पछि पो बेहुली भन्ने भनाइलाई आउंदो संविधान सभा निर्वाचनले झुटो सावित गर्ने भएको छ । न कतै पोष्टर टाँसिएका छन् न त व्यानरहरु नै देखिन्छन् । युवाहरुको हुल पनि हातमा बाल्टिन बोकेर भित्तेलेखनमा हिडेका छैनन् । विराटनगर ४ का मञ्जु आचार्यलाई बिहे आयो तर बेहुली देखिएन भने जस्तो लागिरहेको छ यो चुनाव त ।

भित्ता लेख्नेलाई एक लाख जरिवाना भनेपछि चुनावलाई बेहुली बनाउछु भनेर लागेकाहरु थचक्क बसेका छन् । यो पटक मतदाताहरुले कतै पोष्टर पनि देखेका छैनन् कतै रंगिचंगी ठूला ब्यानर र झण्डा पनि देख्न पाएनन् । तर चुनावको प्रचार भने गाँउमा पुगिसकेको छ ।

उम्मेदवारहरु गाँउ गाउँ लागिसकेका छन् । तर यो पटक उनीहरुले निकै फरक अनुभुति पनि गरेका छन् । अघिल्लो पटकको चुनावमा गाडिका ताँती लगाएर हिड्ने नेताहरुको यो पटक खुट्टो भाँचिए जस्तै भएको छ । निर्वाचन आयोगले नै एउटा गाडि लिएर हिड् भनेपछि उनीहरुको खुट्टो मर्किएको हो ।

संविधान सभाको चुनाव अचम्मको हुदोरहेछ भन्ने अनुभुती उम्मेदवारहरुले मात्र हैन अरुले पनि गरेका छन् । पत्रकार उमेश विश्वकर्मा भन्नुहुन्छ यो चुनाव त नेताले हैन निर्वाचन आयोगले नै भोट मागिदिने चुनाव हो । अचम्मै हो पहिले पहिले हात जोडि जोडि मलाई भोट दिनुपर्छ त्यो दिन कहि नजानु भनेर उम्मेदवार आफै भन्थे तर यो पटक चाहिं आयोग आफै चुनावमा भाग लिन नछुटौं है भनीरहेको छ ।

त्यती मात्र कहाँ हो र यस पाली त कुन उम्मेदवार धनी कुन गरिब नछुट्टीने भएको छ । ल हेर्नुस त हिजो अस्तीको चुनावमा लाखौं खर्च गर्ने बाँनी परेकाहरु यस्तो व्यवस्था भएपछि कस्ता भएका होलान् । अनि पैसा नभएकाहरु चाहिं पक्कै हौसिएका छन् । आखिर सबैले पाँच लाख भन्दा कम नै खर्च गर्न पाउने हुन क्यार । एउटा गाडि र दुइवटा घोडा बाहेक कुदाउन नपाइने भएपछि सबै समान जस्तो देखिएको हो ।

मोरङमा नेकपा एमाले, माओवादी, नेपाली कागें्रस लगायत सबैलाई चुनाव लागीसकेको छ । उनीहरु गाउं गाउं पनि गइसकेका छन् । प्रत्येक गाविसमा अहिले एक दुई जना उम्मेदवारहरु घुमिरहेका छन् । गाउं नरंगिए पनि जनता उमंगमा रहेको र चुनावको चहलपहलले निकै रौनकता थपेको माओवादीको मोरङबाट उम्मेदवार भएका शिवकुमार मण्डलको अनुभव छ । नेकपा एमाले उम्मेदवार महेश रेग्मी यो चुनाव स्वस्थ प्रतिष्पर्धाका हिसाबले निकै राम्रेै रहेको बताउनुहुन्छ ।